မဇ္ဈိမသတင်းဌာန
စက်တင်ဘာလ ၁၄ ရက်၊ ၂ဝဝ၇ ခုနှစ်။
ကချင်ပြည်နယ် မြို့တော် မြစ်ကြီးနားတွင် ညောင်နှစ်ပင် ညီလာခံ ကြိုဆို ထောက်ခံပွဲကို ယခုလ ၁၅ ရက်နေ့တွင် ကျင်းပရန် စီစဉ်ခဲ့သော်လည်း ၂၇ ရက်နေ့သို့ ပြောင်းရွှေ့ လိုက်သည်။
ယခုလ ၁၅ ရက်နေ့တွင် ကျင်းပမည့် ညီလာခံ ကြိုဆို ထောက်ခံပွဲသို့ မြစ်ကြီးနား မြို့ပေါ်ရှိ တအိမ်ထောင်လျှင် တဦးကျ တက်ရောက်ရန် မြောက်ပိုင်းတိုင်း တိုင်းမှူး (မပခ) ဗိုလ်ချုပ်အုံးမြင့် အမိန့်ဖြင့် မကြာသေးခင် ရက်ပိုင်း အတွင်းက စာရင်းများ လိုက်လံ ကောက်ယူခဲ့သော်လည်း ၁၈ ရက်နေ့တွင် သံဃာတော်များမှ ဆန္ဒပြမှုများ ဖြစ်ပွားလာနိုင်သည်ဟု ယူဆသဖြင့် ယခုအခါ ၂၇ ရက်နေ့သို့ ပြောင်းရွှေ့ရန် မယက အာဏာပိုင်များက ရယက များသို့ ပြောကြားလိုက်ခြင်း ဖြစ်သည်။
“၁၅ ရက်ကနေ ၂၇ ရက်ကို ပြောင်းလိုက်တယ်လို့ ပြောတယ်။ ၁၇ ရက်နေ့မှာ ဘုန်းကြီးတွေက ဆန္ဒပြမယ်လို့ ကြေငြာထားလို့ ဖျက်လိုက်တယ်လို့ ပြောကြတယ်။ နေပြည်တော်က အမိန့်နဲ့ ဖျက်လိုက်တယ်တဲ့။ မြို့နယ် ကောင်စီရုံးက ရက်ကွက်ရုံးတိုင်းကို ဖုန်းဆက်ပြီး ပြောတယ်တဲ့။ ရပ်ကွက်မှာတော့ လိုက်မပြောသေးဘူး။ လူထုတွေတော့ အမိန့်အာဏာနဲ့ ခေါ်တော့ သွားရမှာပဲ။ စိတ်ထဲမှာတော့ မသွားချင်၊ မလုပ်ချင်ပေမယ့် လုပ်ပေးရတာပေါ့။ အေအေးဆေးဆေးနဲ့ လိုက်ပေးကြတာပေါ့” ဟု မြစ်ကြီးနား မြို့ခံတဦးက မဇ္ဈိမကို ပြောသည်။
ညီလာခံ တောက်ခံပွဲသို့ မပခ တိုင်းမှူး၏ အမိန့်ဖြင့် တအိမ်ထောင်လျှင် တဦးကျ မတက်မနေရ အမိန့်ထုတ်ခဲ့ကြောင်းနှင့် အခမ်းအနားသို့ လူဦးရေ အနည်းဆုံး ၂ဝဝဝဝ (နှစ်သောင်း) တက်ရောက်ရန် လျာထားခဲ့သည်။ ထောက်ခံပွဲတွင် အထွေထွေ အကြပ်အတည်း ဆန္ဒပြမှုများကို ရှုတ်ချသွားမှာ ဖြစ်သည်။
“ဒီမနက်ရော၊ ညနေကပါ ထိုင်ခုံတွေ ပြန်သယ်သွားကြပြီ။ ကျနော်တို့က စိတ်မပါဘူး၊ မထောက်ခံဘူး။ စိတ်ထဲမှာတော့ ဒီလိုပဲ ထားတယ်။ ဘယ်သူက စိတ်ဝင်စားကြမလဲ။ ဘယ်သူမှ မရှိဘူး။ အားလုံး သိကြပါတယ်” ဟု သူက ဆက်ပြောသည်။
ကချင် အမျိုးသား လွတ်မြောက်ရေး အဖွဲ့ (ကေအိုင်အို) ကိုလည်း အမျိုးသား ညီလာခံ ထောက်ခံပွဲသို့ ပါဝင် တက်ရောက်ရန် ဖိတ်စာ ပေးထားသော်လည်း ယခုအချိန်ထိ တစုံတရာ တုံ့ပြန်မှု မရှိသေးကြောင်း သိရသည်။
လာမည့် အောက်တိုဘာလ ၄ ရက်နေ့တွင် စစ်အစိုးရ ရုံးစိုက်ရာ ကြပ်ပြေး နေပြည်တော်တွင် ကျင်းပမည့် အမျိုးသား ညီလာခံ ကြိုဆို ထောက်ခံပွဲသို့ တက်ရောက်ရန် အတွက်လည်း မြစ်ကြီးနားမှ အသက် ၃ဝ နှစ်အောက် လူငယ်ဦးရေ ၄ဝ ကျော်ကို ကချင်ရိုးရာ ယဉ်ကျေးမှု ဗိမာန်ဌာနမှ ဦးဆောင်ကာ စုဆောင်းနေသည်။
စစ်တပ်က နိုင်ငံ အုပ်ချုပ်ရေးတွင် အမြဲတမ်း ပါဝင်နေမည့် ဖွဲ့စည်းပုံ အခြေခံ ဥပဒေ တရပ်ကို ၁၄ နှစ်ကြာ ရေးဆွဲခဲ့ပြီးနောက် ဆန္ဒ ခံယူပွဲ လုပ်ကာ အတည်ပြုရန် နအဖက စီစဉ်နေပြီး စစ်အစိုးရ စီစဉ်သော ထောက်ခံပွဲများ နိုင်ငံတဝှမ်း လုပ်တော့မှာ ဖြစ်သည်။
Sunday, September 16, 2007
ကချင်ပြည်နယ်က ညီလာခံ ထောက်ခံပွဲ ရက်ရွှေ့ဆိုင်းပြီ
Posted by Ko Myint Maung at Sunday, September 16, 2007
Subscribe to:
Post Comments (Atom)
No comments:
Post a Comment