ရမ်ဘိုရုပ်ရှင်ကို မြန်မာများ ရုံလုံးပြည့် ကြည့်ရှုမည်

နေသွင်
ချင်းမိုင်။ ။ ကမ္ဘာတဝှမ်း ရုံတင်ပြသဆဲ မြန်မာပြည် နိုင်ငံရေး နောက်ခံဖြင့် ရမ်ဘို-၄ ရုပ်ရှင်ကို စင်ကာပူရောက် မြန်မာ (၃ဝဝ) ခန့်သည် တနင်္ဂနွေနေ့တွင် အနီရောင်ဆင်တူ ဝတ်ဆင်လျှက် သွားရောက် ကြည့်ရှုကြမည် ဖြစ်သည်။
ဘူဂစ်စ် Bugis ရုပ်ရှင်ရုံတွင် စင်္ကာပူစံတော်ချိန် ၆ နာရီ ပြသသည့်ပွဲကို မြန်မာများက စက်တင်ဘာ ရွှေဝါရောင် တော်လှန်ရေး၏ သင်္ကတအဖြစ် အနီရောင် ဝတ်ဆင်ပြီး အားပေးကြမည် ဖြစ်သည်။
“ရွှေဝါရောင် တော်လှန်ရေးကို ကျနော်တို့ သတိရတဲ့အနေနဲ့ ထောက်ခံအားပေးတဲ့ အနေနဲ့ အင်္ကျီအနီ ဝတ်လာဖို့ ကျနော်တို့ တိုက်တွန်းလိုက်တယ်” ဟု တနင်္ဂနွေ ညနေပွဲကို စီစဉ်နေသူ၊ စင်္ကာပူ တက္ကသိုလ်မှ ကိုအောင်စရာပြည့်က ပြောသည်။
အထူးအစီအစဉ် အနေဖြင့် ရုပ်ရှင် မစမီတွင် ကမ္ဘာမကျေ သီချင်းကို ဖွင့်ပြမည့် အစီအစဉ် အပါအဝင် မြန်မာပြည်နိုင်ငံရေး နောက်ခံသမိုင်းများကို ဆလိုက်ရှိုးဖြင့် ပြသရန် စီစဉ်သူများနှင့် စင်္ကာပူမှ အာဏာပိုင်များ ဆွေးနွေးနေသည်။
ပြည်ပရောက် မျိုးချစ်မြန်မာများ အဖွဲ့မှ ကိုကြည်မင်းက “ပွဲမစခင်မှာ ကျနော်တို့ နိုင်ငံတော်အလံကို အလေးပြုမယ်။ နောက် ဦးသန့် အရေးအခင်းက ပုံရိပ်တွေ၊ နောက်ရွှေဝါရောင် တော်လှန်ရေးက ပုံရိပ်တွေ အဲဒါတွေကို ဆလိုက်ရှိုးနဲ့ ပြမယ် စိတ်ကူးထားပါတယ်” ဟု မဇ္ဈိမသို့ ပြောသည်။
“စင်ကာပူက လူတွေက ဒါမျိုးလုပ်ပြရင် ကျန်တဲ့ နိုင်ငံတွေကလည်း လိုက်လုပ်ပြလိမ့်မယ်။ ဒါဟာ စည်းလုံးညီညွတ်မှု တခုကိုပြတာပဲ။ မျိုးချစ်မြန်မာတွေ အားလုံးဟာ စစ်အစိုးရကို ဘယ်လို ပုံစံမျိုးနဲ့မဆို ဆန့်ကျင်နေပါတယ် ဆိုတာကို ပြချင်တာ” ဟု သူက ပြောသည်။
ဆက်လက်၍ “ကျနော်တို့ ငယ်ငယ်က ရွှေဘရုပ်ရှင်တွေ ကြည့်သလိုပေါ့ဗျာ။ ရွှေဘကို လူဆိုးတွေက လက်သီးထိုးရင် မကျေနပ်ဘူး၊ ရွှေဘက ပြန်ချရင် အားရပါရနဲ့ အားပေးကြတယ်။ ကျနော်တို့ အဲဒီ Atmosphere၊ အဲဒီ Environment ကို လိုချင်တယ်၊ စင်ကာပူမှာ ကိုယ်လူမျိုးတွေချည်း၊ ရက်စက်တဲ့ အစိုးရကို ရမ်ဘိုက ပြန်ချတဲ့အခါ သူတို့ ရင်ထဲက ခံစားချက်တွေ ပေါက်ကွဲစေချင်တယ်၊ လက်ခုပ်တွေ တီးကြ၊ အားပေးကြ အဲလို လိုချင်တယ်” ဟုပြောသည်။
စင်ကာပူတွင် ရမ်ဘိုကားကို ဇန်နဝါရီလ (၂၄) ရက်နေ့က စတင်ရုံနေခြင်းဖြစ်ရာ အခြေအနေအရ သွားရောက် ကြည့်ရှုပြီးသူများ ရှိသော်လည်း တနင်္ဂနွေနေ့ ပွဲအတွက် လက်မှတ်တစောင်ကို စင်ကာပူဒေါ်လာ (၉ ဒဿမ ၅) နှင့် ရောင်းချသည့်အခါ ရောင်းမလောက်အောင် ဖြစ်နေသည်ဟု သိရသည်။
ခန့်မှန်းထားသော စာရင်းများအရ စင်ကာပူတွင် မြန်မာနိုင်ငံသား (၅ဝဝဝဝ) ခန့် ရှိသည်။