Wednesday, December 24, 2008

ကုန်ဈေးနှုန်းကျဆင်းရေး ဆန္ဒပြသူ ထောင်ဒဏ် ၅ နှစ်ထပ်တိုး

မြင့်မောင်
အင်္ဂါနေ့၊ ဒီဇင်ဘာလ 23 2008

နယူးဒေလီ (မဇ္ဈိမ) ။ ။ ရန်ကုန်မြို့တွင် ကုန်ဈေးနှုန်းကျဆင်းရေး လမ်းလျှောက်ဆန္ဒပြသူ ကိုခင်မောင်ချို (ခေါ်) ကိုဖိုးတုတ်ကို ယမန်နေ့က ရန်ကုန်တိုင်း ရန်ကင်းတရားရုံးက ထောင်ဒဏ် ၅ နှစ် ထပ်တိုးသဖြင့် ပြစ်ဒဏ် ၂၄ နှစ် ဖြစ်သွားသည်။

ဧရာဝတီတိုင်း ဓနုဖြူမြို့နယ်သား သူ့ကို ယခုလ ၈ ရက်နေ့က ကြည့်မြင်တိုင်မြို့နယ် တရားရုံးက ပုဒ်မ ၄ ခုဖြင့် ထောင်ဒဏ် ၁၉ နှစ် ချခဲ့ပြီးနောက်၊ ယမန်နေ့က ရန်ကင်းမြို့နယ် တရားရုံးက နယ်စပ်ဖြတ်ကျော်မှု ပုဒ်မ ၁၃/၁ ဖြင့် ၅ နှစ် ထပ်တိုးချလိုက်ခြင်းဖြစ်သည်။

"ပထမဦးဆုံး စံပြဈေးမှာ ကုန်ဈေးနှုန်း ကျဆင်းရေးတုန်းက သူ ပါခဲ့တယ်။ အလုပ်သမားရေး ကိစ္စတွေမှာလည်း အိုင်အယ်လ်အို (အပြည်ပြည်ဆိုင်ရာ အလုပ်သမားအဖွဲ့ချုပ်) ကို တိုင်တန်းပေးတဲ့ အထဲမှာလည်း ပါဝင်ခဲ့သူပါ။ အခု ၅ နှစ်ထပ်ကျတာပေါ့နော်။ စုစုပေါင်း ၂၄ နှစ်ရှိပြီ" ဟု မိသားစုနှင့် နီးစပ်သူတဦးက မဇ္ဈိမကို ပြောသည်။

ကိုခင်မောင်ချိုကို နိုင်ငံတော်ကို အကြည်ညို ပျက်စေမှု၊ ဗီဒီယိုအက်ဥပဒေ၊ လိမ်လည်မှု၊ စာရွက်စာတမ်းအတု လက်ဝယ်ကိုင်ဆောင်မှုတို့ဖြင့် ကြည့်မြင်တိုင် တရားရုံးက ယခုလ ၈ ရက်နေ့မှ စတင်ကာ နှစ်ရှည်ထောင်ဒဏ် ချခဲ့ခြင်းဖြစ်သည်။

အလားတူ ထိုရက်၌ပင် သူ့အမှုတွဲတွင် ပါဝင်သူ တောင်ဒဂုံမြို့သား ကိုညွန့်ဝင်းကို ၅ နှစ်နှင့် ကိုကံမြင့်ကို ၁၀ နှစ် ပြစ်ဒဏ်ချခဲ့သေးသည်။

Posted by Ko Myint Maung at Wednesday, December 24, 2008

No comments:

Post a Comment

Subscribe to: Post Comments (Atom)