လူ့အခွင့်အရေး စာတမ်း ဖြန့်ဝေသူများကို ထောင်ဒဏ် ၂ နှစ် ချမှတ်

ဖနိဒါ
ချင်းမိုင်။ ။ ရန်ကုန်မြို့တွင် လူ့အခွင့်အရေး ကြေညာစာတမ်းများ ဖြန့်ဝေသူ ၂ ဦးကို စစ်အစိုးရက ထောင်ဒဏ် ၂ နှစ် အပြစ်ပေးလိုက်သည်။
ကြည့်မြင်တိုင်မြို့နယ်မှ ကိုထွန်းမင်းအောင်နှင့် ကိုစန်းလွင်ဦး အား ပြီးခဲ့သည့် ၂ဝဝ၇ ခုနှစ် အောက်တိုဘာလက လူထုကို အထိတ်တလန့် ဖြစ်စေမှု၊ ဆူပူအုံကြွမှု ဖြစ်စေရန် လှုံ့ဆော်မှု ပုဒ်မ ၅ဝ၅ (ခ) ဖြင့် စွပ်စွဲကာ အာဏာပိုင်များက တရားစွဲဆို ထားပြီးနောက် ရုံးချိန်းပေါင်း အကြိမ် ၂ဝ ကျော် ချိန်းခဲ့ပြီးနောက်ပိုင်း ယမန်နေ့ ရုံးချိန်းတွင်မူ ထောင်ဒဏ် ချမှတ်လိုက်ခြင်း ဖြစ်သည်။
“တယောက်ကို ၂ နှစ်စီ ထောင်ချလိုက်တယ်။ မနေ့က ၃ နာရီလောက်မှာပါ” ဟု တရားခံ အကျိုးဆောင်ရှေ့နေ ကိုဖိုးဖြူက ပြောသည်။
“လူ့အခွင့်အရေးနဲ့ ပတ်သက်ပြီးတော့ တင်ပြ ဖော်ထုတ်သူတွေဟာ လူ့အခွင့်အရေးနဲ့ ပတ်သက်ပြီးတော့ ရသင့် ရထိုက်တဲ့ လွတ်လပ်စွာ ပြောဆိုခွင့်ဟာ အမှန်တကယ်ပဲ လူ့အခွင့်အရေး ကြေငြာစာတမ်းမှာ ပါတဲ့ ပြဆိုချက်တွေ၊ ညွှန်ပြချက်တွေနဲ့အညီ ရရှိခြင်း မရှိသေးပါဘူးလို့ ကျနော်က ဥပဒေ အမြင်အရ ပြောချင်ပါတယ်” ဟု သူက ထပ်ပြောသည်။
အဆိုပါ လူငယ်နှစ်ဦးသည် ၂ဝဝ၇ ခုနှစ် အောက်တိုဘာ ၁၃ ရက်နေ့ နံနက်ပိုင်းက ကြည့်မြင်တိုင်မြို့နယ်ရှိ သီရိမင်္ဂလာဈေး အပေါ်ထပ်မှ လူ့အခွင့်အရေး ကြေငြာချက်စာတမ်းနှင့် စစ်အစိုးရကို ဝေဖန် ပုတ်ခတ်သည့် စာရွက်များ အစောင်ရေ ၁ဝဝ ခန့် ဖြန့်ကျဲခဲ့သဖြင့် လူထုအုံကြွမှု ဖြစ်စေရန် လှုံ့ဆော်မှု ဆိုကာ ဒေသအာဏာပိုင်များက ဖမ်းဆီးခဲ့ခြင်း ဖြစ်သည်။
လက်ရှိအချိန်တွင် သူတို့ကို အင်းစိန် အကျဉ်းထောင်တွင် ထောင်သွင်း အကျဉ်းချထားပြီး ရဲဘက်ခေါ် အလုပ်ကြမ်း စခန်းများသို့ ပို့မည့် အန္တရာယ်လည်း ကြုံတွေ့နေရသည်။
ကိုစန်းလွင်ဦး ဇနီး မလေးက “ကျမ အရမ်း ခံစားရပါတယ်။ ကျမမှာ နှလုံးရောဂါ ရှိတယ်။ စားဖို့နေဖို့အတွက် အားလုံး ဒုက္ခရောက် ကျပ်တည်းနေတယ်။ ကိုယ့်ဒုက္ခကိုယ် ခါးစည်းပြီး ခံနေရတယ်။ ဒါပေမဲ့ ကျမယောက်ျားက မဟုတ်တာ လုပ်တာ မဟုတ်ဘူး၊ မမှန်ကန်တာ လုပ်တာ မဟုတ်ဘူးဆိုတဲ့ သတ္တိတွေ မွေးပြီး ကြံ့ကြံ့ခံနေတာပါ။ တပတ်တခါ ရုန်းကန်ပြီး ထောင်ဝင်စာပို့ဖို့ ရုံးချိန်းမှာသုံးဖို့ ရှာဖွေပြီး လုပ်နေတာကို ဘယ်သူမှ မသိကြဘူး” ဟု ပြောသည်။
“အလုပ်ကြမ်းဘက် မဖြစ်အောင်တော့ လိုက်ရအုံးမယ်” ဟု သူက ဆက်ပြောသည်။
“စစ်အစိုးရဟာ ဥပဒေ လုပ်ထုံးလုပ်နည်းနဲ့ မညီညွတ်တာတွေ လုပ်နေတယ်။ ဒါကြောင့် ကျနော်တို့ မြန်မာနိုင်ငံမှာ ရှိတဲ့ ဥပဒေ လုပ်ထုံးလုပ်နည်း ကျော်လွန် ဆောင်ရွက်မှုတွေဟာ ဒီအမှုတွဲမှာ ကျော်လွန် ဆောင်ရွက်မှုတွေ တွေ့ရတယ်။ ဥပဒေထဲမှာ ဒီလို လုပ်ထုံးလုပ်နည်းတွေ မရှိဘူး။ လုပ်ထုံးလုပ်နည်းတွေကို ကျော်လွန် ဆောင်ရွက်လိုက်တာဟာ ပြည်သူ ပြည်သားတွေရဲ့ တရားမျှတမှုကိုပါ ထိပါးသွားစေတယ်။ ဥပဒေ အခွင့်အရေးတွေကိုလည်း ဆုံးရှုံးသွားစေပါတယ်” ဟု ကိုဖိုးဖြူက ပြောသည်။
သူတို့နှစ်ဦး ဖြန့်ကျဲခဲ့သည့် စာစောင်များတွင် အပြည်ပြည်ဆိုင်ရာ လူ့အခွင့်အရေး ကြေညာစာတမ်းပါ အပိုဒ် ၃ဝ နှင့် ရွှေဝါရောင် တော်လှန်ရေးအတွင်း စစ်အစိုးရက သံဃာနှင့် ကျောင်းသားလူထုကို သတ်ဖြတ်သည့်အပေါ် “လူသတ်သမား၊ သာသနာဖျက်”၊ “မိစ္ဆာ တကိုယ်ကောင်း စစ်အာဏာရှင်စနစ်” စသည့် စကားလုံးများပါ ပါရှိသည်။
ရုံးချိန်းတွင် ကိုထွန်းမင်းအောင် က “ကျနော်ကိုယ်တိုင် မြင်ခဲ့၊ တွေ့ခဲ့၊ ကြားခဲ့၊ သိခဲ့ရတဲ့ စက်တင်ဘာ ၂၆ ရက်နေ့မှာ ကြေးသွန်း ဘုရားကြီးရှေ့မှာ လူထုနဲ့ သံဃာတွေ အရိုက်နှက်ခံ၊ အကြမ်းဖက်ခံရတဲ့၊ မှန်တာကို မှန်တဲ့အတိုင်း၊ မြင်တဲ့ အတိုင်း၊ ကြားတဲ့ အတိုင်း ပြည်သူကို သိစေချင်တဲ့ အတွက်ကြောင့် ရေးပြီးတော့ ဆန္ဒထုတ်ဖော်တာ” ဟု တရားရုံးတွင် ဝန်ခံစကားပြောခဲ့သည်။
ထို့အပြင် လူ့အခွင့်အရေး လှုပ်ရှားမှုတွင် ပါဝင်ခဲ့သည့် လှိုင်သာယာမြို့နယ်မှ ဦးကံမြင့်ခေါ် ဦးမောင်မောင်မြင့်၊ တောင်ဒဂုံမြို့နယ်မှ ကိုညိုဝင်း၊ ဧရာဝတီတိုင်း ဓနုဖြူမြို့နယ်မှ ကိုဖိုးတုတ်ခေါ် ကိုခင်မောင်ချို တို့ကိုလည်း ပုဒ်မ ၅ဝ၅(ခ)ဖြင့် တရားစွဲဆိုထားသည်။